Posted on

Fitlight búnaður í verkfærakistuna

Nú nýverið eignaðist Afreksíþróttasvið Borgarholtsskóla nýtt og glæsilegt æfingatæki, Fitlight. Tækið býður upp á fjölmarga möguleika til að þjálfa viðbragð og hraða í íþróttum. Einn helsti kostur þess er á hversu marga vegu stilla má tækinu upp til að búa til aðstæður og hreyfingar sem líkjast leik og keppni.

Tækið er samansett af 8 ljósum og stjórnborði sem stýrir því hvernig og hvenær það kviknar á ljósunum. Þannig má stilla ljósum upp allt eftir því hvert markmið æfingarinnar er. Markmið íþróttamannsins er svo að bregðast við og “slökkva” á ljósinu með því að snerta eða nálgast ljósið eins hratt og hægt er.

Stefnt er að því að setja upp sérstakar hraða og snerpuvinnusmiðjur næsta haust þar sem tækin verða notuð vikulega.

Eins og svo oft áður segir myndskeið svo miklu meira en 1000 orð, svo við látum eitt kynningarvídeó fylgja með hér.

Við hlökkum mikið til að kynna þetta verkfæri fyrir nemendum okkar, og gaman að geta þess að mörg af flottustu liðum úti í heimi eiga svona tæki til þjálfunar. Þá eru skólar á borð við IMG academy og Aspire fótbolta akademían með samskonar tæki.

Sveinn Þorgeirsson

Verkefnisstjóri

Posted on

25 handboltanemendur unnu sér sæti í Olís-deildinni með Fjölni

Hvorki fleiri né færri en 25 nemendur (útskrifaðir og núverandi) afreksíþróttasviðsins komu við sögu og spiluðu risastóran þátt í velgengni meistaraflokka Fjölnis í vetur þegar bæði lið unnu sér sæti meðal þeirra bestu. Það er gaman til þess að hugsa að árið 2012 hóf handbolti á afreksíþróttasviði göngu sína með 14 nemendur á skrá. Haustið 2016 voru skráðir 44 nemendur úr 7 félögum af höfuðborgarsvæðinu. Það má því með sanni segja að starfið hafi vaxið og dafnað hratt. Þáttur sviðsins í uppganginum á afreksíþróttasviðinu er mjög áhugaverður og verður spennandi að fylgjast með þessum hópi á næstu árum.

Kvennaliðið tryggði sér 1. sætið með sigri í úrslitaleik gegn KA/Þór á heimavelli um helgina. Leikurinn var jafn og spennandi lengst af og urðu lokatölur 28-26.

Karen Birna nemandi á AÍS átti stórleik gegn KA/Þór í úrslitaleiknum og varði 21 skot. Mynd: Þorgils G.

Hér má sjá tölfræði frá tímabili afrekssviðs nemenda.

NAFN LEIKIR MÖRK GUL 2 MÍN
Berglind Benediktsdóttir 21 58 5 7
Andrea Jacobsen 20 101 4 4
Sara Sif Helgadóttir *markm. 19 2 0 0
Helena Ósk Kristjánsdóttir 18 35 4 1
Andrea Björk Harðardóttir 18 22 1 14
Kristín Lísa Friðriksdóttir 17 15 2 3
Karen Birna Aradóttir *markm. 16 0 0 0
Þórhildur Vala Kjartansdóttir 9 2 2 7
Sara Margrét Brynjarsdóttir 9 1 0 0
Sara Dögg Hjaltadóttir 1 0 0 0
samtals 148 236 18 36

Drengirnir höfðu þegar tryggt sér sæti í efstu deild fyrir sigurleikinn gegn Mílunni með 17 sigurleikjum í röð í byrjun tímabils.

Goði er einn margra yngri landsliðsmanna sem eru á afreksíþróttasviði í handbolta. Mynd: Þorgils G.

Hér má sjá tölfræði frá tímabili afrekssviðs nemenda.

NAFN LEIKIR MÖRK GUL 2 MÍN
Kristján Örn Kristjánsson 22 131 5 17
Arnar Máni Rúnarsson 18 6 2 7
Jón Pálsson *markm 21 0 0 0
Breki Dagsson 21 121 3 12
Brynjar Óli Kristjánsson 21 9 2 2
Björgvin Páll Rúnarsson 20 111 5 3
Bergur Snorrason 18 28 2 9
Bjarki Lárusson 18 30 0 2
Daníel Freyr Rúnarsson 11 7 0 0
Sveinn Þorgeirsson *verkefnisstjóri AÍS 11 6 4 5
Goði Ingvar Sveinsson 6 1 0 1
Egill Árni Jóhannesson 4 0 0 0
Hafsteinn Óli Berg Ramos Rocha 4 0 0 0
Drengur Arnar Kristjánsson 1 0 0 0
Viktor Berg Grétarsson 1 1 0 0
Þorleifur Rafn Aðalsteinsson 1 0 0 0
samtals 198 451 23 58
Starfsmenn
Arnar Gunnarsson *þjálfari AÍS 22 3 1

 

Posted on

Kolbeinn Tómas átti frábært mót

Nemendur úr einstaklingslínu afrekssviðis Borgarholtsskóla hafa ekki slegið slöku við á þessu tímabili. Kolbeinn Tómas varð nú fyrir skemmstu fjórfaldur Íslandsmeistari í sínum aldursflokki þar sem hann vann gull í kúluvarpi, þrístökki og 4x200m boðhlaupi og lokum  yfirburðasigur í sinni helstu grein á innanhússtímabilinu í sjöþraut.

Hér sjáum við Kolbein koma í mark með keflið í 200m boðhlaupi fyrir sveit ÍR. Óskum Kolbeini og þjálfara hans Brynjari (þjálfara á afreksíþróttasviðinu) innilega til hamingju með árangurinn!

með bestu kveðju

Sveinn verkefnisstjóri

Posted on

Helga og Styrmir Íslandsmeistarar

Helgina 25.-26. febrúar fór fram Meistaramót Íslands 15-22 ára í frjálsum íþróttum. Þar urðu þau Helga Þóra Sigurjónsdóttir og Styrmir Dan Hansen Steinunnarson Íslandsmeistarar í sínum aldursflokki. Þau eru bæði á afreksíþróttasviði í Borgarholtsskóla og keppa fyrir Fjölni.

Við óskum þeim innilega til hamingju með þetta, og Styrmi góð gengis í bata eftir aðgerð sem hann fór nýlega í!

með bestu kveðju

Sveinn, þjálfarar afreksíþróttsviðsins og Teddi Fjölnisþjálfari

Posted on

Viðari Ari semur við Brann!

Virkilega ánægjulegar frengir!

Viðar Ari Jónsson fyrrum nemi af afreksíþróttasviði hefur samið við ´urvalsdeildarlið Brann í Noregi og gert við liðið atvinnumannasamning. Þetta er stórt skref en við vitum að Viðar er toppeintak og vel undirbúinn. Hann útskrifaðist frá Borgarholtsskóla á afreksíþróttasviði haustið 2014 og hefur undanfarin ár farið mikinn með úrvalsdeildarliði Fjölnis í Pepsi deildinni.

Við óskum Viðari innilega til hamingju og gangi honum sem allra best úti!

með kveðju

Sveinn verkefnisstjóri og þjálfarar

Posted on

Fróðlegir skóhlífadagar

Dagskrá skóhlífadaga var með hefðbundnu sniði og gengu þeir vel fyrir sig. Á þessum þemadögum skólans er hefðbundið skólastarf brotið upp með námskeiðum og uppákomum í skólanum sem nemendum gefst færi á að velja sig í eftir áhugasviði. Afreksíþróttasvið hefur staðið fyrir góðri dagskrá undanfarin ár með flottum fyrirlestrum og veglegum hádegismat. Árið í ár var engin undantekning og fengum við að hlusta á Margréti Lilju frá íþróttafræðisviði HR fjalla um hve mikill árangur hefur náðst varðandi forvarnir vímuefna í skipulögðu íþróttastarfi og fleira byggt á rannsóknum Rannsókna og greiningu. Var sá fyrirlestur hluti af samstarfi AÍS við íþróttafræðisviðið í HR. Að því loknu steig Margrét Lára Viðarsdóttir, íþróttafræðingur og meistaranemi í sálfræði á stokk og fjallaði um andlegan styrk íþróttamanna. Talaði hún einnig af eigin reynslu ásamt því að tala stuttlega um kvíða, sjálfstraust og túlkun tilfinninga.

Posted on

Allir velkomnir! Opnar frammistöðumælingar í Egilshöll

Sæl öll,

Við á afreksíþróttasviði bjóðum ykkur öll velkomin, og sérstaklega einstaklinga í 9. og 10. bekk grunnskóla. Mælingarnar fara fram 21. febrúar kl. 10-12.

Þær mælingar sem í boði verða eru:

  • Spretthraði (á 10 og 30m)
  • Skothraðapróf (með hraðamælingarbyssu)
  • Illinois agility (snerpupróf í kringum keilur)
  • Davies próf (styrkur í miðju líkamans)
  • Yfirhöfuð hnébeygja (hreyfanleiki)
  • Lóðrétt stökkhæð (með viðurkenndri aðferð)

    Mælingarnar eru ókeypis og munu þátttakendur fá létta hressingu og mælingablað með niðurstöðum.

    Í boði verður að fá upplýsingar og kynningu á náminu við afreksíþróttasviðið og námsráðgjafar á svæðinu.

    Hlökkum til að sjá ykkur!

Posted on

5. afhending – og aldrei fleiri fengið styrk!

Mánudaginn 9. janúar fór fram afhending á landsliðsstyrk afreksíþróttasviðs, og var það í 5. sinn sem nemendum er veittur styrkur fyrir ferðum á vegum landsliða. Fyrir haustönn voru margir sem fengu styrk og hópurinn því sérstaklega stór – sem er frábært. Hver nemandi fékk viðurkenningarskjal og 25.000 kr. styrk greiddann.

5. afhending landsliðsstyrks í Borgarholtsskóla. Frá vinstri, efri röð. Ársæll skólameistari, Arnar Máni, Daníel Freyr, Tumi Steinn, Hafsteinn Óli, Jón Bald, Andrea J., Sveinn verkefnisstjóri. Frá hægri neðri röð; Bryndís B., Berglind B., Sara Margrét, Arnór Snær, Hjalti J., Elvar Snær. Á myndina vantar Goða Ingvar, Theu Imani og Arnar Geir.

Verkefni þeirra sem fengu styrk eru eftirfarandi

Arnór Snær og Tumi Steinn (úr Val), Arnar Máni, Daníel Freyr, Jón Bald, Hafsteinn Óli og Goði Ingvar (úr Fjölni) tóku allir þátt í undanleppni HM í Frakklandi með U17 í handbolta.

Bryndís Bolladóttir sundkona tók þátt í Norðurlandameistaramóti í 25 metra laug.

Andrea Jacobsen og Berglind Benediktsdóttir úr Fjölni kepptu með U19 ára landsliði kvenna í handknattleik á Opna Evrópumeistaramótinu í Svíþjóð.

Hjalti Jóhannsson og Elvar Snær Ólafsson kepptu með U20 í íshokkí á HM í Mexíkó.

Þá keppti Arnar Geir Líndal körfuknattleiksmaður úr Fjölni með U16 ára landsliðinu í körfubolta.

Thea Imani úr Fylki tók þátt í verkefni með A landsliðinu í handknattleik og Sara Margrét  úr Fjölni fór til USA til móts við A-landsliðs Bandaríkjanna í handknattleik.

Óskum þessu flotta afreksfólki til hamingju með árangurinn og einnig að þau haldi áfram að standa sig svona vel.

Sveinn Þorgeirsson

Posted on

RISAFRÉTT: NÝTT ÍÞRÓTTAHÚS

Það má segja að árið 2017 byrji með stæl! Í dag var skrifað undir samninga milli Borgarholtsskóla og Fjölnis um starfsemi afreksíþróttasviðsins og aukið samstarf aðilanna tveggja. Ennfremur var undirritaður samningur við Reginn og Reykjavíkurborg um byggingu íþróttahúss með tveimur löglegum handboltavöllum á.

Á myndinni má sjá Jón Karl Ólafsson formann Fjölnis, Dag. B. Eggertsson borgarstjóra og Ársæl skólameistara okkar undirrita samninginn í dag.

Það þarf ekki að fjölyrða um hve mikil bylting þetta er fyrir boltagreinar í Grafarvoginum. Við höfum lengi búið við aðstöðuleysi og sótt aðstöðu í nágrannasveitarfélög. Nú mun hinsvegar rísa frábært hús á góðum stað þar sem sviðið fær að blómstra.

Hlökkum til framtíðarinnar og til hamingju nemendur á afreksíþróttasviði og verðandi nemendur!

Sveinn Þorgeirsson, verkefnisstjóri

Posted on

Glæsilegur og stór útskriftarhópur frá afreksíþróttasviðinu

Óvenju stór og glæsilegur hópur nemenda útskrifaðist frá afreksíþróttasviði Borgarholtsskóla í desember síðastliðnum. Nemendurnir höfðu lokið 6 áföngum á afrekinu og fengu öll útskriftargjöf frá sviðinu sem samkvæmt venju var POLAR púlsklukka. Þó nokkrir höfðu lokið nokkrum áföngum á afreksíþróttasviðinu og óskum við þeim einnig til hamingju með útskriftina.

Frá vinstri, Sveinn verkefnisstjóri, María Eva, Sæmundur, Þorgeir, Thea, Guðný, Hulda, Diljá, Óðinn, Hulda Hrund, Stefanía, Nína, Ragnar og Logi.

Eins og svo oft áður voru afreksíþróttanemendur fyrirferðarmiklir á útskrift. Þar má nefna að tónlistaratriðin flutti dúx útskriftarinnar og handknattleiksmaðurinn úr Víking hann Logi Gliese Ágústsson. Þar að auki flutti Thea Imani Sturludóttir handknattleikskona og landsliðskona úr Fylki ávarp útskriftarnemenda. Þar að auki sópuðu nemendur af afreksíþróttasviðinu til sín verðlaunum, svo mörgum að ég man þau ekki öll og læt því ógert að nefna einhver og gleyma öðrum 🙂   Innilega til hamingju engu að síður!

Logi Gliese Ágústsson spilaði tvö lög á píanó, fyrra lagið var frumsamið og heitir Jazz on a Tuesday eða Djass á þriðjudegi og síðara lagið var eftir Emmsé Gauta og Aron Can og heitir Silfurskotta.

Að lokum er vert að geta þess að þetta var fyrsti hópurinn sem útskrifast frá afreksíþróttasviðinu með ÍSÍ þjálfarastig 1. Þeir hópar sem innritast frá og með haustinu 2016 fá stig 1. og 2. að því gefnu að þau hafi gilt skyndihjálparnámskeið (verður í boði í Borgarholtsskóla fyrir þau) og þjálfarareynslu uppáskrifaða af sínu félagi.

Við erum ákaflega stolt af þessum nemendum okkar og óskum þeim velfarnaðar í framtíðinni!

Sveinn Þorgeirsson