Auglýst eftir umsóknum um landsliðsstyrk á sérstökum tímum

Kæru nemendur,

Þrátt fyrir að tíðin sé óhefðbundin ætlum við að auglýsa eftir umsóknum um landsliðsstyrk líkt og gert hefur verið undanfarin ár. Reglurnar eru þær sömu þó viðbúið sé að umsóknir verði færri en áður.

Frá styrkveitingu haustsins 2019.

Við hvetjum ykkur sem hafið farið í verkefni á vegum landsliðs á þessu tímabili frá upphafi skólaárs og fram til 10. desember að sækja um í gegnum þetta rafræna umsóknareyðublað.

<< Rafrænt umsóknareyðublað landsliðsstyrks haust 2020 >>

Við höfum samband við þá sem uppfylla skilyrði og hljóta styrk við annarlok.

með bestu kveðju

Sveinn Þorgeirsson og kennarar AFR

Pistill frá verkefnisstjóra (áður birtur í Grafarvogsblaðinu)

Hvernig starfar afreksíþróttasvið á tímum kórónaveiru? Þegar aðalatriðið í náminu er þjálfun í keppnisíþróttum og samstarf við þjálfara og samnemendur?

Við höfum reynt að draga fram aðrar sterkar hliðar á starfi sviðsins eins og kostur hefur verið. Við sníðum umhverfið á sviðinu okkar þannig að það styðji við íþróttaþátttöku og árangur í keppni eins vel og hægt er. Helstu áherslur okkar undanfarið hafa verið að styðja við nemendur með hagnýtum verkefnum, sem eru unnin rafrænt, í bland við líkamlega þjálfun á heimavelli með æfingaáætlunum frá fagfólkinu okkar.

Það er lítið um verklega þjálfun þessa dagana vegna heimsfaraldurs.

Við vitum að álag á nemendur í framhaldsskóla er mikið, og ekki bætir heimsfaraldur úr skák. Við höfum eftir fremsta megni reynt að styðja við bakið á nemendum með samtali við þá og hóflegu verkefnaálagi, milli þess sem við höfum fengið þau til okkar í íþróttahúsið.

Við höfum meðal annars boðið nemendum upp á ráðgjöf í formi viðtala við kennarana okkar um afmarkaða frammistöðuþætti sem ættu að hjálpa nemendum að halda dampi á óreglulegum tímum. Þar má nefna viðtal við sjúkraþjálfara vegna meiðsla og endurhæfingar, við íþróttasálfræðiráðgjafa vegna endurskipulagningar á markmiðum og endurgjöf á sálfræðipróf sem þau hafa tekið hjá okkur, viðtöl við íþróttafræðinga vegna æfingaáætlana og einkatíma hjá næringarfræðingi.

Eitt af áhugaverðari verkefnum vorsins var í formi myndskeiðs sem nemendur bjuggu til í kringum greiningu sem þau unnu á sér. Nemendur greindu eigin styrkleika, veikleika, tækifæri og ógnanir í þeirri stöðu sem upp var komin í tengslum við þeirra nám og íþróttaiðkun. Í vel skipulögðu þriggja mínútna myndskeiði tókst nemendum almennt vel að svara þessum fjölþættu spurningum.

Það er okkar helsta markmið að útskrifa nemendur með aukna þekkingu á þeim þáttum sem eru mikilvægir til árangurs í íþróttum og námi. Auka líkamlega, félagslega og hugarfarslega færni þeirra tengd íþróttaiðkun þeirra og hæfni í því að meta eigin framþróun sem íþróttafólks. Þannig geta þau síðar orðið sínir eigin þjálfarar, sem hafa tilfinningu fyrir þáttum sem hafa áhrif á frammistöðu þeirra, bæði líkamlega og hugarfarslega en einnig í umhverfi þeirra því enginn nemandi nær toppárangri án þess að hafa sterkt bakland. Við lítum svo á að við séum mikilvægur hlekkur í baklandi okkar nemenda.

Sveinn Þorgeirsson, verkefnisstjóri

pistill birtist áður í Grafarvogsblaðinu

Afrekið í Grafarvogsblaðinu

Stuttur pistill eftir verkefnisstjórann birtist í nýjasta tölublaði Grafarvogsblaðsins fyrir októbermánuð. Þar var farið yfir nokkuð af því sem á daga verkefnisstjóra hefur drifið að undanförnu í starfi.

Þórður varð Íslandsmeistari í kata

Ein af jákvæðum fréttum vikunnar hér á afreksíþróttasviði er sú að Þórður Jökull Henrysson varð Íslandsmeistari í kata í flokki fullorðinna. Mótið fór fram um helgina var upphaflega sett á í mars fyrr á þessu ári en hafði verið frestað.

Í umfjöllun um mótið er haft eftir að “Má segja að kynslóðaskipti hafi átt sér stað því eldri keppendur máttu láta í lægra haldi fyrir þeim yngri.”

Hér má lesa meira um Íslandsmeistaramótið sem fram fór

Við óskum Þórði innilega til hamingju með árangurinn!

SÞ og kennarar AFR

13 nemendur af afreksíþróttasviði útskrifast

Það var gleðidagur hjá nemendum sem útskrifuðust við örlítið aðlagaða en fallega athöfn í Borgarholtsskóla þann 6. júní sl. Nemendur af bóknámi voru brautskráðir fyrir hádegi og aðrar deildir eftir hádegi í samræmi við reglur um samkomur.

Nemendur sem hafa lokið öllum áföngum afreksíþróttasviðs var veitt gjöf við tilefnið eins og gert hefur verið undanfarin ár. Þetta er þó í síðasta skiptið sem þessi háttur verður hafður á.

Hér má sjá glæsilegan hóp nemenda sem útskrifaðist þennan fallega laugardag.

Efri röð frá vinstri, Benedikt, Bergún Ósk, Sigurður Teitur, Stefán Jóhann, Aðalsteinn Einir, Brynjólfur Óli, Hafsteinn Óli, Þorleifur Rafn, og í neðri röð frá vinstri eru Thelma, Ragna og Sveinn verkefnisstjóri. Á myndina vantar Styrmi, Ólínu, Evu Kareni og Aron Breka.

Óskum þessum nemendum og öðrum þeim sem útskrifuðust frá Borgarholtsskóla í vor innilega til hamingju með áfangann og góðs gengis í verkefnum framtíðarinnar

Sveinn verkefnisstjóri og kennarar við afreksíþróttasviðið

12 afhending landsliðsstyrks fyrir vorið 2020

Líkt og annað í starfi afreksíþróttasviðsins á síðari hluta þessarar annar var afhending landsliðsstyrks fyrir önnina ólík því sem áður hefur verið. Afhendingin var rafræn í þetta skiptið og á myndinni má sjá hver það voru sem hlutu styrk. Það þarf ekki að koma á óvart að styrkirnir eru færri en oft áður vegna fjölda utanlandsferða sem var aflýst nú í vor.

Frá rafrænni afhendingu landsliðsstyrks fyrir vorið 2020 (12. skiptið). Frá vinstri, Elín (íshokkí), Brynjólfur og Ragna (sund), Valdís (blak) og Þórður (karate).

Til hamingju öll og gleðilegt sumar!

Hvernig er umgjörðin á afreksíþróttasviðinu?

Hvað fæ ég fyrir efnisgjaldið sem fylgir því að vera á afreksíþróttasviðinu? Til að upplýsa umsækjendur, forráðafólk og nemendur hvað það er sem felst í efnisgjaldinu sem fylgir því að vera á afreksíþróttasviðinu höfum við tekið saman það helsta.

Markmiðið með innheimtu efnisgjaldsins er að geta búið nemendum sem bestu umgjörð til æfinga og þann stuðning sem þarf hverju sinni. Vekjum athygli á því að kostnaður við laun fastra kennara er greiddur af skólanum og fellur því ekki undir þetta gjald sem er 40.000 kr. á önn.

Myndin er jafnan tekin skömmu eftir að fatnaður hefur verið afhentur. Í fyrra sömdum við við Sportmenn um að vera í fatnaði frá adidas.

Fatnaður nemenda til æfinga er innifalin. Við leggjum upp með að allir séu í eins æfingafatnaði merktum sviðinu. Við teljum að þetta sé mikilvægt til að búa til heildarbrag á nemendahópinn þar sem nemendur koma úr ólíkum greinum og íþróttafélögum, saman í námið við Borgarholtsskóla. Innifalið er tvöfalt æfingasett af bolum, stuttbuxum og sokkum, síðerma æfingatreyja ásamt íþróttatösku fyrir nýnema, og einfalt æfingasett ásamt síðarma treyju fyrir nemendur á 2. og 3. ári.

Búnaður til æfinga á að vera fyrsta flokks og til að hafa hann sem bestan þarf að endurnýja  bolta, teygjur, vesti, keilur og fleira.

Nýnemar fara í sérstaka nýnemaferð sem er í grunninn hópeflisferð þar sem farið er út á land og dagurinn jafnan skipulagður að hausti. Til stendur í fyrsta skipti að fara með nemendur á 2. og 3. ári í ferðir út á land einu sinni á ári. Þessar ferðir eru námsferðir og verða skipulagðar í kringum það námsefni sem verður til umfjöllunar á þeim tíma sem farið er. Lagt verður upp með að fara á þeim tíma sem veldur minnstu raski á íþróttaþátttöku með íþróttafélagi.

Nemendur sem hafa náð þeim árangri að komast í landslið í sinni íþrótt og farið erlendis tengt verkefnum á þeirra á vegum fá landsliðsstyrk sem nemur allt að 25.000 kr. á hverri önn. Um þennan styrk gilda sérstakar reglur sem byggja m.a. á námsárangri og ástundun. Styrkurinn  fæst styrkurinn greiddur gegn framvísun flugmiða. Hugmyndin á bakvið þennan styrk er að styrkja nemendur sem hafa náð þessum góða árangri að keppa fyrir landsliðið sem oftar en ekki fylgir aukinn kostnaður.

Nemandi á afreksíþróttasviðinu sem nær bestum námsárangri (hæsta meðaleinkunn úr öllum 6  AFR áföngum) í AFR áfangunum af útskriftarhópnum fær POLAR púlsúr til viðurkenningar við útskrift.

Nemendur á afreksíþróttasviði eru tryggðir gegn alvarlegum meiðslum eins og nánar er tilgreint í samningi við TM á vefsíðu sviðsins www.bhs.is/afreks.

Aðgangur að sundlaug Grafarvogs á skólatíma fæst gegn framvísun nemendaskírteinis afreksíþróttasviðsins.

Nemendur sem lenda í alvarlegu meiðslum eða veikindum til lengri tíma bjóðast einstaklingsviðtöl við sérfræðinga til að stuðla að sem bestu bataferli og endurkomu í íþróttina þeim að kostnaðarlausu. Í boði er viðtal við íþróttasálfræðiráðgjafa, næringarfræðing og sjúkraþjáfara. Nemendur og forráðamenn geta óskað eftir þessari þjónustu af eigin frumkvæði við þessar aðstæður. Við höfum getað leiðbeint nemendum og forráðafólki og vísað á viðeigandi sérfræðinga ef þeir eru ekki nú þegar í ferli.

Tækifærisviðburðir á borð við heimsóknir í aðra skóla og ráðstefnur hafa verið hluti af námi skólans og hefur afreksíþróttasviðið staðið straum af þeim kostnaði sem hlýst af því að mestu eða öllu leiti.

Viðburður á skóhlífadögum – sameiginlegur morgun með afrekssviði MK

Dagskrá nemenda afreksíþróttasviðsins á Skóhlífadögum hefur undanfarin ár verið að hluta skipulögð af sviðinu. Þar hafa margir flottir fyrirlesarar komið til okkar og boðuð upp á ýmsar veitingar með.

Skólinn hefur undanfarin ár sent nemendur í námsferðir erlendis í gegnum styrkt verkefni og á sama hátt tekið á móti nemendum. Við slíkar ferðir hefur fellur stundum til kosntaður við mótttöku nemenda og það að senda okkar fólk út.

Nemendur frá VOSS með okkar fólki í ferð í Bláa Lóninu.

Þess má að auki geta að allir nemendur við Borgarholtsskóla hafa aðgang að World Class í Egilshöll á skólatíma.

Þess má að auki geta að gjaldið hefur haldist óbreytt frá stofnun sviðsins árið 2008.

Þetta er það helsta þegar kemur að því að svara spurningunni, “hvað er verið að greiða fyrir með efnisgjöldum á afreksíþróttasviðinu?”

svör við fyrirspurnum veitir Sveinn Þorgeirsson á sveinn@bhs.is

Gróska í faraldri

Vikurnar áður en samkomubannið tók gildi fjallaði fræðsluþema afreksíþróttasviðsins um gróskuhugarfar (e. growth mindset). Rannsóknir hafa sýnt að með fræðslu um eiginleika og kosti þessa hugarfars má bæta árangur í leik og starfi. Þetta hugarfar hefur nefnilega tengingu við svo margt sem við fáumst við í daglegu lífi og í okkar tilfelli skóla og íþróttum.

            Það má til einföldunar stilla upp tveimur valkostum við það hvernig við nálgumst erfið verkefni eins og áskoranir og mistök. Við getum litið á þær sem ógn og þannig forðast þær og kviðið fyrir þeim. Sú nálgun hefur verið kölluð fastmótað hugarfar (e. fixed mindset) og er það ekki vænlegt til árangurs. Hún leiðir til þess að við höldum okkur við það sem við vitum að við getum, prófum fátt nýtt og förum síður út fyrir þægindarammann. Þetta kemur heim og saman við helstu einkenni fastmótaðs hugarfars – það er að hafa ekki þá trú að viðkomandi geti tileinkað sér þá færni sem til þarf.

            Þau okkar sem hafa ræktað með sér gróskuhugarfar í mistökum og áskorunum takast á við mistök og áskoranir á annan hátt. Þó áskorunin sé mikil og færnin ekki til staðar þýðir það ekki að svo verði alltaf hafi viðkomandi tileinkað sér gróskuhugarfar. Hann trúir því að mistök séu hluti af því að læra, áskoranir séu eftirsóknarverðar og að vinnusemi muni skila honum árangri að lokum. Það sem skilur á milli nálgunar gróskuhugarfars annars vegar og fastmótaðs hugarfars hins vegar gerir gæfumuninn. Hvernig hugarfar við temjum okkur er geysilega mikilvægt því það á þátt í svo mörgum ákvörðunum okkar á hverjum degi. Fram undan er tækifæri til að byggja upp nýjar venjur, losa sig við slæma siði og upplifa breyttan veruleika um stund.