Vildum minna ykkur á síðuna okkar á instagram sem þið finnið undir @afreksvid
Mundu @afreksvid á Instagram
Verðlaun fyrir námsárangur á afreksíþróttasviði við útskrift – haust 2020
Það er fátt venjulegt við þetta ár, eins og t.d. útskriftin sem er framundan. Þar ætlum við að byrja nýtt fyrirkomulag við viðurkenningar sem kynnt var í vor í annarri tilkynningu. Í ár verða veittar viðurkenningar þeim tveimur nemendum sem hafa áunnið sér hæstu meðaleinkunn úr áföngum á afreksíþróttasviðinu. Þau fá POLAR FT7 púlsúr að launum svo þau viti hvað hjartað þeirra slær á erfiðum æfingum.
Það er reyndar líka mikilvægt upp á framtíðina hlusta á og fylgja hjartanu því við óskum öllum nemendum okkar þess að þau hafi kjark og dug til að eltast við sína drauma, í hverju sem þeir geta verið fólgnir.
Verðlaunin í ár fyrir frábæran námsárangur á afreksíþróttasviði fá
Ingi Þór Ólafsson, kylfingur
Karítas María Arnardóttir, fótboltakona
Við óskum þeim tveimur innilega til hamingju með frábæran námsárangur hjá okkur á tíma sínum í skólanum.
| Adda Sólbjört Högnadóttir | Handbolti |
| Edda Björg Eiríksdóttir | Fótbolti |
| Egill Árni Jóhannesson | Handbolti |
| Elvar Karl Auðunsson | Frjálsar íþróttir |
| Emil Skorri Þorsteins Brynjólfsson | Fótbolti |
| Guðni Emil Guðnason | Fótbolti |
| Heiðrún Anna Hauksdóttir | Fimleikar |
| Hrafnhildur Jónsdóttir Kvaran | Handbolti |
| Ingi Þór Ólafson | Golf |
| Jóhann Árni Gunnarsson | Fótbolti |
| Jón Kristinn Ingason | Fótbolti |
| Karítas María Arnardóttir | Fótbolti |
| Leó Ernir Reynisson | Fótbolti |
| Lilja Nótt Lárusdóttir | Fótbolti |
| María Eir Magnúsdóttir | Fótbolti |
| Ólafur Már Einarsson | Fótbolti |
| Sigursteinn Ásgeirsson | Frjálsar íþróttir |
| Tumi Steinn Rúnarsson | Handbolti |
| Þórður Gunnar Hafþórsson | Fótbolti |
Vegna sóttvarna verður því miður ekki hægt að taka hópmynd eins og gert hefur verið undanfarin ár.
Gangi ykkur ótrúlega vel!
með bestu kveðju
SÞ, verkefnisstjóri afreksíþróttasviðs og kennarar AFR
Uppfærð inntökuskilyrði og nýtt umsóknareyðublað
Tilkynning um breytt fyrirkomulag umsókna á afreksíþróttasviði
Við höfum uppfært inntökuferlið okkar með því að breyta umsóknareyðublaði í rafrænt skjal sem hægt er að fylla út á netinu. Skjalið er hægt að nálgast hér á hlekknum fyrir neðan og mun gera ferlið skilvirkara. Þá hefur verið horfið frá kröfu um skrifleg meðmæli og er þess í stað beðið um upplýsingar um meðmælanda sem hefur veitt samþykki fyrir því. Haft verður samband við þá meðmælendur eftir því sem við á.
Umsóknareyðublað fyrir afreksíþróttasvið – VORÖNN 2021
Sameiginlegt umsóknartímabil framhaldsskóla sem bjóða upp á innritun fyrir nám á vorönn 2021 verður dagana 1.-30. nóvember nk.
Tilkynning um breytt inntökuskilyrði á afreksíþróttasviði
Ákveðið hefur verið að útvíkka þau skilyrði sem þarf til að uppfylla skilyrði á afreksíþróttasviði Borgarholtsskóla. Áður var miðað við eingöngu íþróttir sem eru sambandsaðili að ÍSÍ. Í dag er miðað við eftirfarandi:
“Miðað er við að nemendur stundi íþrótt skipulega undir handleiðslu þjálfara “
*Afreksíþróttasvið áskilur sér rétt til að hafna umsókn ef sýnt þykir að umrætt íþróttastarf standist ekki kröfur sviðsins sem gerðar eru um skipulag æfinga og þjálfun undir stjórn þjálfara.
Fyrirspurnum varðandi ofangreint fyrirkomulag svarar verkefnisstjóri afreksíþróttasviðs Sveinn Þorgeirsson, í tölvupósti sveinn.thorgeirsson@borgo.is
Uppfært fyrirkomulag umsókna á afreksíþróttasvið
Í takt við tíðarandann og tæknina höfum við uppfært umsóknarferlið okkar.
Nú gildir að sækja um í skólann í gegnum INNU hér https://www.inna.is/framhaldsskolaumsokn/ og fresturinn er til 30. nóvember nk.
OG
Fylla út eftirfarandi umsóknareyðublað sem inniheldur upplýsingar um íþróttahlið námsmannsins.
Ef það eru einhverjar spurningar, vinsamlegast hafið samband við verkefnisstjóra
Sveinn Þorgeirsson, sveinn.thorgeirsson@borgo.is
Auglýst eftir umsóknum um landsliðsstyrk á sérstökum tímum
Kæru nemendur,
Þrátt fyrir að tíðin sé óhefðbundin ætlum við að auglýsa eftir umsóknum um landsliðsstyrk líkt og gert hefur verið undanfarin ár. Reglurnar eru þær sömu þó viðbúið sé að umsóknir verði færri en áður.
Við hvetjum ykkur sem hafið farið í verkefni á vegum landsliðs á þessu tímabili frá upphafi skólaárs og fram til 10. desember að sækja um í gegnum þetta rafræna umsóknareyðublað.
<< Rafrænt umsóknareyðublað landsliðsstyrks haust 2020 >>
Við höfum samband við þá sem uppfylla skilyrði og hljóta styrk við annarlok.
með bestu kveðju
Sveinn Þorgeirsson og kennarar AFR
Pistill frá verkefnisstjóra (áður birtur í Grafarvogsblaðinu)
Hvernig starfar afreksíþróttasvið á tímum kórónaveiru? Þegar aðalatriðið í náminu er þjálfun í keppnisíþróttum og samstarf við þjálfara og samnemendur?
Við höfum reynt að draga fram aðrar sterkar hliðar á starfi sviðsins eins og kostur hefur verið. Við sníðum umhverfið á sviðinu okkar þannig að það styðji við íþróttaþátttöku og árangur í keppni eins vel og hægt er. Helstu áherslur okkar undanfarið hafa verið að styðja við nemendur með hagnýtum verkefnum, sem eru unnin rafrænt, í bland við líkamlega þjálfun á heimavelli með æfingaáætlunum frá fagfólkinu okkar.
Við vitum að álag á nemendur í framhaldsskóla er mikið, og ekki bætir heimsfaraldur úr skák. Við höfum eftir fremsta megni reynt að styðja við bakið á nemendum með samtali við þá og hóflegu verkefnaálagi, milli þess sem við höfum fengið þau til okkar í íþróttahúsið.
Við höfum meðal annars boðið nemendum upp á ráðgjöf í formi viðtala við kennarana okkar um afmarkaða frammistöðuþætti sem ættu að hjálpa nemendum að halda dampi á óreglulegum tímum. Þar má nefna viðtal við sjúkraþjálfara vegna meiðsla og endurhæfingar, við íþróttasálfræðiráðgjafa vegna endurskipulagningar á markmiðum og endurgjöf á sálfræðipróf sem þau hafa tekið hjá okkur, viðtöl við íþróttafræðinga vegna æfingaáætlana og einkatíma hjá næringarfræðingi.
Eitt af áhugaverðari verkefnum vorsins var í formi myndskeiðs sem nemendur bjuggu til í kringum greiningu sem þau unnu á sér. Nemendur greindu eigin styrkleika, veikleika, tækifæri og ógnanir í þeirri stöðu sem upp var komin í tengslum við þeirra nám og íþróttaiðkun. Í vel skipulögðu þriggja mínútna myndskeiði tókst nemendum almennt vel að svara þessum fjölþættu spurningum.
Það er okkar helsta markmið að útskrifa nemendur með aukna þekkingu á þeim þáttum sem eru mikilvægir til árangurs í íþróttum og námi. Auka líkamlega, félagslega og hugarfarslega færni þeirra tengd íþróttaiðkun þeirra og hæfni í því að meta eigin framþróun sem íþróttafólks. Þannig geta þau síðar orðið sínir eigin þjálfarar, sem hafa tilfinningu fyrir þáttum sem hafa áhrif á frammistöðu þeirra, bæði líkamlega og hugarfarslega en einnig í umhverfi þeirra því enginn nemandi nær toppárangri án þess að hafa sterkt bakland. Við lítum svo á að við séum mikilvægur hlekkur í baklandi okkar nemenda.
Sveinn Þorgeirsson, verkefnisstjóri
pistill birtist áður í Grafarvogsblaðinu
Afrekið í Grafarvogsblaðinu
Stuttur pistill eftir verkefnisstjórann birtist í nýjasta tölublaði Grafarvogsblaðsins fyrir októbermánuð. Þar var farið yfir nokkuð af því sem á daga verkefnisstjóra hefur drifið að undanförnu í starfi.
SÞ
Þórður varð Íslandsmeistari í kata
Ein af jákvæðum fréttum vikunnar hér á afreksíþróttasviði er sú að Þórður Jökull Henrysson varð Íslandsmeistari í kata í flokki fullorðinna. Mótið fór fram um helgina var upphaflega sett á í mars fyrr á þessu ári en hafði verið frestað.
Í umfjöllun um mótið er haft eftir að “Má segja að kynslóðaskipti hafi átt sér stað því eldri keppendur máttu láta í lægra haldi fyrir þeim yngri.”
Þóður á efsta palli eftir frábæran árangur í kata um helgina.
Þórður með verðlaun að loknu móti hér til vinstri.
Við óskum Þórði innilega til hamingju með árangurinn!
SÞ og kennarar AFR
13 nemendur af afreksíþróttasviði útskrifast
Það var gleðidagur hjá nemendum sem útskrifuðust við örlítið aðlagaða en fallega athöfn í Borgarholtsskóla þann 6. júní sl. Nemendur af bóknámi voru brautskráðir fyrir hádegi og aðrar deildir eftir hádegi í samræmi við reglur um samkomur.
Nemendur sem hafa lokið öllum áföngum afreksíþróttasviðs var veitt gjöf við tilefnið eins og gert hefur verið undanfarin ár. Þetta er þó í síðasta skiptið sem þessi háttur verður hafður á.
Hér má sjá glæsilegan hóp nemenda sem útskrifaðist þennan fallega laugardag.
Óskum þessum nemendum og öðrum þeim sem útskrifuðust frá Borgarholtsskóla í vor innilega til hamingju með áfangann og góðs gengis í verkefnum framtíðarinnar
Sveinn verkefnisstjóri og kennarar við afreksíþróttasviðið
12 afhending landsliðsstyrks fyrir vorið 2020
Líkt og annað í starfi afreksíþróttasviðsins á síðari hluta þessarar annar var afhending landsliðsstyrks fyrir önnina ólík því sem áður hefur verið. Afhendingin var rafræn í þetta skiptið og á myndinni má sjá hver það voru sem hlutu styrk. Það þarf ekki að koma á óvart að styrkirnir eru færri en oft áður vegna fjölda utanlandsferða sem var aflýst nú í vor.
Til hamingju öll og gleðilegt sumar!
SÞ